Posted in Uncategorized

TUM MERE HO…………………!

Ye kya ho raha hai mujhko?
Man itna vichlit kyun hai?
Itni ashanti kyun hai?
Hriday me ye dwanda  kaisa hai?
Ye to bilkul waise hi hai,
Jaise kisi shant se talab me,
Kisi ne patthar fenka ho
Jiski tarangein kinare tak to jati hain,
Magar inka silsila khatm nahi hota|
Main ek thahraw chahta hun,
Ek shanti,
Ek santulan aur
Kuch khali samay|
Kisi khas mudde par
thoda vichar karna chahta hun|
tabhi dil ke kone se ek awaz aati hai,
ANAND! Ye kya hua tumko?
Tum to aise na the!
Tumhein in chijon ki jarurat kab se padne lagi?
Iska koi jawab nahi hai mere paas!
Kyun?
Shayed is kyun ka jawab “tum” ho!
Tum kyun aaye mere jivan me?
Kyun mere dil aur dimag dono par chaye rahte ho?
Kyun meri aankhein bheed me kewal tumhe hi dhundti hain?
Kyun har waqt tumhara hansta hua chehra mere samne rahta hai?
Kyun mai tumhe is duniya se churana chahta hun?
Kyun mai har waqt tumhari hi batein sunna chahta hun?
Kyun mai nahi chahta ki tumse koi aur baat kare?
Kyun mujhe tumse ladne aur fir manane me maja aata hai?
Mujhe nahi pata ye sab,
Mai bas tumhe pana chahta hun|
Tumhara aawran (cover) banna chahta hun|
Tumhe duniya se bachana chahta hun|
Bilkul waise hi,
Jaise seep me moti|
Tum bhi usi moti jaise ho,
amulya aur durlabh|
Lekin sochta hun ki,
mera tum par kya haq hai?
Kahin koi tumhe mujhse cheen na le,
Jaise moti ko uske seep se|
Main tumse kewal itna hi chahta hun ki,

“Mere in sawalon ka jawab de do, hamare is rishte ko ek naam de do|
Tum mere ho, keh sakun is duniya se, ratti sa mujhe ye haq de do|”